ماشوفتش صورتى ف الاهرام؟

ايه اللى حصل

مالك؟
ماكنت كويس
بتصحى الصبح زى الناس
بتاكل م اللى مايشبعش
وتشرب ميه مضروبه بفيرس سى

وبتقابل بنات ياما
وتسمع نفس الكلام والضحك
عريس جالها
باباها خنيقها ع المواعيد
اخوها مابيعجبوش اللبس
بيعجبها اسامه منير
شريط عمرو اللى مش حفظاه
حماقى عجبها ف الاخر
بحبك ..وحشتينى
مادى الغنوه اللى عايزاك تقولهالها

ايه الجديد اللى ف حياتك
رجعت الديسك ف المبنى
اتعملك عقد 6شهور
وجالك ضغط يامعلم
وبرد شديد وفى المعده

ساعتك كام؟
ياريت تانى ماتتأخرش

ميعادك بكره من6
رئيسك ف العمل كارهك
ومش عارف دا كارهك ليه؟

ديونك زادت المره ادى
قبضت الشهر ده ناقص
377
جنيه

والسبب غلطه
هتتعوض
ماياسر رزق قالهالك

يومين ف المستشفى قتلينك
لا صاحب جالك
ولا حد قال مالك

حقن ماشى
حبوب ماشى
لبوس مافيش حاجه ..مايجراشى

يادكتور لسه باقى كتير؟
تعبت خلاص من التحاليل
ونفسيتى بقت وحشه

ماحدش سأل عنى؟

مانا عارف هاموت بدرى
ياعم خلاص
صغير يعنى دى الفارقه

مش فارقه
انت ايه مضايقك؟
انا اللى هاموت
وهتحاسب

على فكره
انا ماسفرتش امبارح
ماحبتش انام ف حرام
بينى وبينك
انا لسه باخاف م النوم

قول خايب
وقول خايف من اللى خالقنى
معاى اخوات
بنات يعنى

قوللى صحيح
ماشفتش صورتى ف الجورنان؟
ماشفتش صورتى ف الاهرام؟

تمام يعنى
انا برضه احتمال عايش